ايه هو الهارد ديسك .. الهارد ديسك هو القرص الصلب ( يا فرحتى جبت حاجة جديدة )
لأ مش قصدى الهارد عبارة عن وحده من وحدات الكمبيوتر اللى بيتخزن عليها البيانات ..
إختصارة HDD يعنى ايه ؟؟ يعنى Hard Disk Driver .. محرك القرص الصلب ..
نيجى نبص على الهارد من جوا .. ( لسه كاسر الهارد القديم بتاعى عشان ابص فى بقة ) ..
الهارد من جوا عباره عن بتاعه كده زى الإسطوانه ... دى بنقول عليها الميديا .. الميديا دى اللى بيتخزن عليها البيانات .. الوحدة المرنة بتاعت الهارد يعنى ..
وبعدين راكب فوقيها على طول الإبرة .. ودى اللى بتقرا الداتا ..
واصل فى الإبرة دى مجال كهرومغناطيسى بيحرك الإبرة فى اتجاه واحد وبفترات زمنية متساوية زى عقارب الساعه ..
الإسطوانة المرنة أو ( الميديا ) راكبة فى حاجة تقدر تقول عليها محرك .. عشان تلف بسرعه ..
عدد لفات الهارد ببقى متفاوته يعنى مثلا الهاردات الجديده 7200 لفة فى الدقيقة .. بتعرف منين عدد لفات الهارد حتلاقى على ورقة البيانات اللى عليها فوق حاجة مكتوبة إسمها Speed : xxxx RPM و xxxx بيكون مكانها رقم و RPM هى اختصار لـ Round Per Menute ..
المهم كل دا بقى ( الإسطوانة والإبرة و المحركات ) متصلين بحاجة إسمها بوردة الهارد .. بتاعه خضرا كده ورا الهارد اظننا كلنا بنشوفها ..
فيها إي سيهات وحاجات كده ..
متوصله بمعالجات بسيطة فى البوردة دى .. والبوردة فيها بورتين او فتحتين ...
البورت الأولانى بتاع كابل الداتا العريض الرصاصى دا وساعات بيبقى اصفر .. والبورت التانى الرفيع شوية بتاع كابل الباور ..
====
طريقة عمل الهارد ديسك ( من خلال تجربتى فيه وهو مفتوح ) ..
اول لما الجهاز بيشتغل والباور يشتغل .. يبدأ يوصل للهارد كهربا .. فى لمبه صغيرة جوا الهارد بتقيد .. اللمبه دى بتدى اشاره للمحرك الكهرو مغناطيسى بتاع الإبره .. المحرك دا بيخلى الإبرة تتحرك .
فى فى البوردة بتاعت الهارد حته سمرا كده من جوا دى زى رامات .. فيها معلومات الهارد اللى بتظهر على الشاشة ..
المهم .. انت دخلت الويندوز دلوقتى والنظام شغال ..
عاوز تروح مثلا .. تتفرج على فيلم .. والفيلم دا على القطاع E:\ ..
تقوم البكرة اللى عليها الإسطوانه تلف لحد ما الإبرا تقرا القطاع المطلوب ..
خش جوا فولدر Movies مثلاً .. حيوح لفة كمان شوية وطالعه فوق او تحت .. حسب مكان الفولدر على القرص ..
حتلاقى الفيلم اللى انت عاوزه حتدخل فيه ..
اول لما تشغل الفيلم والويندوز ميديا بلاير يشتغل .. الإبرة بتلف على القرص كله .. كأن القرص هو إسطوانه عليها الفيلم .
يا رب اكون وضحت شوية ..
====
دلوقتى فى ناس بتقول إن الهارد بيبوظ من الأفلام ..
ليه يا عم ... قال لما تشغل الفيلم وترجع وتقدم تقوم الإبرة راجعه ورايحة تخدش القرص ..
طيب إزاى وهى طول النهار بتلف عليه ..
صحيح
الإبرة مش بتلمس القرص خالص .. دى بتبقى فوقيه بحاجة بسيطه ..
المهم إن شاء الله حصور الهارد بتاعى دا وحطلع عينه واجيبهلكمم عشان تشوفوه لايف من جوا ..
يا رب اكون افدتكم بحاجة ..
موضوع: الهارد ديسك hdd هام جدا جدا 
الجمعة ديسمبر 05, 2008 9:58 am
